Աշխարհահռչակ շեֆ խոհարար, ռեստորատոր, «Գուրմե» փառատոնի համահիմնադիր Ռետո Մատիսը, ով Եվրոպայի լավագույն պիցցայոլաներից է, Food&Wine պորտալին տված բացառիկ հարցազրույցում խոսել է Հայաստանից ստացված տպավորությունների, հայկական մթերքի, խոհանոցի մասին և նշել պիցցայի իր սիրելի տեսակը, որը ներկայացրել է Երևանում։
– Հավանեցի՞ք Հայաստանը։
– Շատ։ Շատ շնորհակալ եմ մարդկանց հետ շփման համար, հատկապես` գյուղերում։
– Ձեզ դուր եկա՞վ հայկական մթերքը։
– Ֆանտաստիկ մթերք է։ Դուք ունեք սեզոնայնություն, ինչը շատ կարևոր է։ Ձեզ մոտ տարբեր մարզերում աճում են առանձնահատուկ մրգեր և բանջարեղեն։ Կան հիանալի ռեստորաններ և շատ մեծ ներուժ։
– Հայկական խոհանոցի ո՞ր ճաշատեսակն եք ամենից շատ հավանել։
– Մենք վերջերս դա էինք քննարկում։ Եթե դուք ինչ–որ մեկին հարցնեք` ի՞նչն է տիպիկ հայկական, խնդիր կլինի։ Քանի որ լավ ճաշատեսակները շատ են։ Այս պահին կանգ ենք առել մեկ առանձնահատուկ ազգային ճաշատեսակի վրա, որը բոլորն առանձնացրեցին, դա լավաշն է։ Այո, դուք ունեք գառան միս, դդումով բրինձ, ձուկ, բայց ինձ համար տիպիկ հայկականը լավաշն է տարբեր լցոններով։
– Տոլմա համտեսե՞լ եք, դուր եկա՞վ։
– Այո, նաև տոլման։
– Բայց ձեզ համար լավագույնը լավա՞շն է։
– Ինձ համար` այո։
– Կնշեք պիցցայի` ձեր սիրած տեսակները։
– Կա միայն մեկը` տրյուֆելներով։
– Որպես Կիպրոսում ամենահայտնի ռեստորանի սեփականատեր` հարցնեմ. հայկական և հունական խոհանոցներն ունե՞ն ընդհանուր բան։
– Նրանք երկուսն էլ նման են մթերքի որակով և թարմությամբ։ Իհարկե, հունական խոհանոցը գտնվում է միջերկրածովյան խոհանոցի ազդեցության տակ` ձուկ, ծովամթերք, ձիթայուղ։ Հայկական խոհանոցն ավելի շատ արևելյան է` բոլոր այդ քարավանները, որոնք անցել են այստեղով հին ժամանակներում և ինչ–որ բան են թողել ։ Բայց դուք չեք կարող համեմատել հունական և հայկական խոհանոցները։ Նրանք լրիվ տարբեր են։ Մեկի համար ես գնում եմ Հունաստան, մյուսի համար` Հայաստան։
– Հայաստանում գտե՞լ եք մթերք կամ բաղադրատոմսեր, որոնք հետագայում կօգտագործեք։
– Ես տեսա դդումը, որը հաստատ կօգտագործեմ, լավաշը։ Դուք չեք կարող լավաշ թխել Շվեյցարիայում, բայց ճամփորդություններում կան ոգեշնչման աղբյուրներ։ Դուք ստանում ենք նոր տպավորություններ, տեսնում եք նոր մթերքներ, ուտելիքի ներկայացման, պատրաստման եղանակներ։–0–
