ԵՐԵՎԱՆ, 19 հունվարի./Նովոստի-Արմենիա/. Հայտնի շեֆ խոհարար Անուշ Միրզոյանցը Facebook-յան իր էջում կիսվել է կատարյալ սուրճի բաղադրատոմսով։
«Ինչպե՞ս պատրաստել կատարյալ սուրճ, լսիր ինքդ քեզ, ի՞նչ ես այսօր անում, ի՞նչ տրամադրություն ունես, հանգստությու՞ն, հրաշքնե՞ր»,- սրանք այն հարցերն են, որոնք, ըստ Անուշի, պետք է տաս ինքդ քեզ։
Անհրաժեշտ բաղադրիչներ 1 բաժակի համար
- սև սուրճ - 2 թեյի գդալ
- վարդի ջուր - 1 ճաշի գդալ
- հիլ (կարդամոն) – 2-3 հատիկ
- աղացած հիլ - դանակի ծայրով
- մեխակ – 3-4 հատ
- դարչին – 1 ձողիկ
- կծու կարմիր պղպեղ - դանակի ծայրով
- աղ - դանակի ծայրով
- շաքարավազ - 1 թեյի գդալ
- ջուր – 1.5 բաժակ
«Ջուրը պետք է չափել այն բաժակով, որով խմելու եք սուրճը: Վերցնում եք ջազզվեն, լցնում սուրճը, սառը ջուրը, ավելացնում դարչինի ձողիկը, հիլի հատիկներն ու մեխակը: Այնուհետև ավելացնում եք շաքարավազն, աղն ու պղպեղը, ապա սկսում հարել։ Դնում եք մարմանդ կրակին ու անընդհատ խառնում: Երբ սուրճը սկսում է բարձրանալ, ավելացնում եք աղացած հիլն ու վարդի ջուրը, և կրկին խառնում։ Սպասում եք մինչև սուրճը կրկին բարձրանա, ապա վերցնում եք կրակից։ Թեյի գդալով հեռացնում ենք առաջացած փրփուրը և լցնում բաժակի մեջ»,- գրել է Անուշը։
Վայելեք...
